थाइल्यान्डबाट मुम्बई आएका एक भारतीय नागरिकले दर्जनौं विषालु सर्प तस्करी गरेको भन्सार अधिकारीहरूले बताएका छन्।
४४ इन्डोनेसियाली पिट भाइपरसहितका सर्पहरू ‘चेक–इन ब्यागेजमा लुकाएर राखिएको’ मुम्बई भन्सार कार्यालयले आइतबार राति विज्ञप्तिमार्फत जनाएको छ। ‘थाइल्यान्डबाट आएका एक भारतीय नागरिकलाई पक्राउ गरिएको छ,’ भन्सार कार्यालयले भनेको छ।
ती व्यक्तिसँग तीन स्पाइडर–टेल्ड हर्न्ड भाइपर र पाँच एसियाली कछुवा पनि थिए। यी भाइपर विषालु छन् तर सामान्यतया चरालगायत साना जीवलाई मात्र शिकार गर्छन्।
मुम्बई भन्सारले जफत गरिएका सर्पहरूको तस्बिर सार्वजनिक गरेको छ, जसमा बाल्टिनमा घुमिरहेका नीलो र पहेँलो सर्पहरू देखिन्छन्। मुम्बईमा सर्प तस्करी असामान्य मानिन्छ। भन्सारले प्रायः तस्करीको सुन, नगद, गाँजा वा कोकेनका गोली जफत गर्छ।
यसअघि फेब्रुअरीमा मुम्बई विमानस्थलमा इन्डोनेसिया, मलेसिया र थाइल्यान्डको जंगलमा पाइने पाँच सियामाङ गिब्बनसहित एक तस्कर पक्राउ परेका थिए।
इन्टरनेसनल युनियन फर कन्जरभेसन अफ नेचरले खतरामा परेका ती साना बाँदरहरूलाई ‘ट्रली ब्यागको प्लास्टिक टोकरीमा चलाखीपूर्वक लुकाएर’ राखिएको भन्सारले जनाएको थियो।
नोभेम्बरमा १२ कछुवा र एक महिनाअघि चार हर्नबिल चरा बोकेका यात्रु पक्राउ परेका थिए। सेप्टेम्बरमा, अलिगेटर परिवारका पाँच किशोर कैमन्ससहित दुई यात्रु पक्राउ परेका थिए। एएफपी
