नेपालको समग्र विकासमा भारत सरकार सकारात्मक: शेखर कोइराला
विराटनगर, पुस २८ –भारत, जनता दल (युनाइटेड) का नेता एवं बिहार सरकारका समाज कल्याण मन्त्री मदन सहनीले शुक्रबार विराटनगरस्थित कोइराला निवासमा नेपाली कांग्रेसका नेता डा. शेखर कोइरालासँग भेटघाट गर्नुभएको छ।
नेपाली कांग्रेस महानगर सभापति दीपक चापागाईंको सहजीकरणमा सम्पन्न उक्त भेटघाटमा नेपालको समग्र विकासमा भारत सरकारको सकारात्मक भूमिका रहेको डा. कोइरालाले बताउनुभयो। उहाँले दुई देशबीचको ऐतिहासिक मित्रता र सहयोगको महत्वसमेत जोड दिनुभएको थियो।
त्यस अवसरमा मन्त्री सहनीले नेपाललाई पर्यटकका लागि अद्भुत देशका रूपमा उल्लेख गर्दै पर्यटन प्रवर्द्धनका लागि थप प्रयास गर्नुपर्ने आवश्यकता औंल्याउनुभयो। उहाँले दुई देशबीचको जनस्तरमा रहेको सम्बन्धले आर्थिक, सामाजिक, र सांस्कृतिक क्षेत्रमा सकारात्मक प्रभाव पारेको उल्लेख गर्नुभयो।
भेटघाटमा नेपाल-भारत साझेदारीलाई अझ सुदृढ बनाउने र विभिन्न क्षेत्रमा आपसी सहकार्यलाई अघि बढाउने विषयमा पनि छलफल भएको थियो।
यस प्रकारका उच्चस्तरीय भेटघाटले नेपाल-भारत सम्बन्धलाई नयाँ उचाइमा पुर्याउने अपेक्षा गरिएको छ।
