अजमल अन्सारी
सुनसरी । सशस्त्र प्रहरी बल भण्टावारी गुल्मले अवैध भारतीय कपडा बरामद गरेको छ। भारतबाट अवैध रूपमा नेपाल भित्र्याउन लागिएको कपडा सीमा क्षेत्रबाट नियन्त्रणमा लिइएको सशस्त्र प्रहरीले जनाएको छ।
सशस्त्र प्रहरी भण्टावारी गुल्मका गुल्मपति सशस्त्र प्रहरी नायब उपरीक्षक (डीएसपी) केदार जङ थापाका अनुसार सीमा क्षेत्रको नियमित गस्तीका क्रममा भारततर्फबाट ल्याइँदै गरेको करिब २ लाख ४८ हजार रुपैयाँ बराबरको कपडा नियन्त्रणमा लिइएको हो।
‘सीमा क्षेत्रमा अवैध तस्करी रोक्न सशस्त्र प्रहरी बलले कडाइका साथ निगरानी गरिरहेको छ,’ थापाले भने, ‘बरामद गरिएका कपडा आवश्यक कानुनी प्रक्रिया पूरा गरी सम्बन्धित निकायमा बुझाइएको छ।’
बरामद गरिएका कपडामा साडी, सलवारसुट, कुर्ता र विभिन्न प्रकारका रेडिमेड सामग्री रहेका छन्। सशस्त्र प्रहरी बल भण्टावारी गुल्मले सीमा सुरक्षा सशक्त बनाउँदै अवैध कारोबार र तस्करी नियन्त्रणलाई प्राथमिकतामा राखेको जनाएको छ।
