इनरुवा । सुनसरीको बर्जु गाउँपालिका–५ मुस्लिम टोलमा एक युवती झुण्डिएको अवस्थामा मृत फेला परेकी छन्।
सदाव आलम अन्सारीको २१ वर्षीय श्रीमती अफाफ आरिफले आफ्नै पुरानो घरको कोठामा सलको पासो लगाएको अवस्थामा मृत फेला परेकी हुन्। घटनास्थलमा शनिबार बिहान साढे ७ बजे ससुरा सफाज मियाले मृत अवस्था देखेपछि प्रहरीलाई खबर गरेका थिए।
घटनाको जानकारी पाउनेबित्तिकै ईलाका प्रहरी कार्यालय सितागंजबाट प्रहरी नायब निरीक्षक सिक्शेर राईको कमाण्डमा प्रहरी टोली खटिएको थियो। टोलीले घटनास्थल सुरक्षित गरी प्रारम्भिक अनुसन्धान थालेको जनाएको छ।
त्यसपछि थप अनुसन्धान तथा कानुनी प्रकृयाका लागि ईलाका प्रहरी कार्यालय दुहबीबाट प्रहरी निरीक्षक सागर तिमल्सिनाको नेतृत्वमा प्रहरी र SOCO टोली समेत घटनास्थल पुगेको थियो।
कानुनी प्रक्रिया पूरा गरी बिहान साढे १० बजे मृतकको शव पोष्टमार्टमका लागि विराटनगरस्थित कोशी अस्पताल पठाइएको थियो। दिउँसो साढे १ बजे पोष्टमार्टम सम्पन्न भएपछि मृतककी ससुरा सफाज मियाले शव बुझेर लगेको प्रहरीले जनाएको छ।
घटनाबारे थप अनुसन्धान जारी रहेको प्रहरीले जनाएको छ।
