सुनसरी । सुनसरीको हरिनगर गाउँपालिका-३ गौतमपुरस्थित सडकखण्डमा प्रहरीले ठूलो मात्रामा गाँजासहित एक सवारीसाधन नियन्त्रणमा लिएको छ।
गोप्य सूचनाको आधारमा जिल्ला प्रहरी कार्यालय सुनसरीको समन्वयमा प्रहरी चौकी घुस्किहाट, भुटाहा र अस्थायी प्रहरी चौकी गौतमपुरबाट खटिएको संयुक्त प्रहरी टोलीले प्र.१-०२-००४ ह १६४३ नम्बरको सिटी सफारीलाई सोमबार दिउँसो १ बजे जाँचका लागि रोकेको थियो। जाँचका क्रममा सवारीमा बोरा भित्र लुकाइछिपाई राखिएको अवस्थामा ४१ के.जी. गाँजा जस्तो देखिने लागू औषध फेला परेको जिल्ला प्रहरी कार्यालय सुनसरीले जनाएको छ।
प्रहरीले उक्त सवारीसाधनसहित सवारी चालक इनरुवा नगरपालिका- ७ का ३० वर्षीय अमिर मियाँलाई नियन्त्रणमा लिएर थप अनुसन्धान गरिरहेको जनाएको छ।
प्रहरीका अनुसार लागू औषधको कारोबारमा संलग्न अन्य व्यक्तिहरुको खोजी तथा अनुसन्धान कार्य पनि तीव्र पारिएको छ।
