हाल देशभर लगातारको वर्षासँगै बाढी, पहिरो र डुबानजस्ता प्राकृतिक विपद्का घटनाहरू तीव्र रूपमा बढिरहेको सन्दर्भमा राष्ट्रिय स्वतन्त्र पार्टी (रास्वपा) ले आज एक विज्ञप्ति जारी गर्दै विपद् पूर्वतयारी र राहत-उद्धारमा तत्काल सक्रियता देखाउन आग्रह गरेको छ।
पार्टीका कार्यबाहक सभापति डोलप्रसाद अर्यालद्वारा हस्ताक्षरित विज्ञप्तिमा विपद् पूर्वतयारी र पश्चात्कालीन प्रतिक्रिया सम्बन्धी दुई चरणको रणनीति उल्लेख गरिएको छ।
विज्ञप्तिअनुसार, मौसम विज्ञान विभागले यो वर्ष मनसुन औसतभन्दा बढी सक्रिय हुने पूर्वानुमान गरेकाले सम्भावित जोखिम न्यूनीकरण, उद्धार, राहत तथा पुनःस्थापनाको कार्यमा प्रभावकारी सहकार्य आवश्यक भएको उल्लेख गरिएको छ।
जोखिमयुक्त वस्ती, खोला किनार र पहिरो सम्भावित क्षेत्रहरूको पहिचान गरी सूचीकृत गर्न, स्थानीय प्रशासन, सुरक्षा निकाय र सम्बन्धित संयन्त्रसँग समन्वय गरी तदनुसारको तयारी गर्न, आवश्यक परेमा त्रिपाल, ढोका, प्राथमिक औषधि लगायत राहत सामग्रीको व्यवस्था मिलाउन तथा ‘स्वयंसेवक समूह’ तयार राख्न र सामाजिक सञ्जालमार्फत जनचेतनामूलक सन्देश प्रवाह गर्न रास्वपाले सुझाएको छ।
विपद् पश्चात्कालीन प्रतिक्रियाका लागि घटनास्थलमा सहज राहत व्यवस्थापनका लागि तत्काल समन्वय र अनुगमन गर्न, पीडित स्थानमा तत्काल प्राथमिक उपचार र सुरक्षित स्थानमा स्थानान्तरणको व्यवस्था गर्न, स्थानीय तह, सरोकार निकायसँग समन्वय गरी पुनःस्थापनाका कार्य अघि बढाउन, प्रभावित क्षेत्रमा पार्टीका कार्यकर्ताहरूलाई सक्रिय रूपमा परिचालन गर्न रास्वपाले आग्रह गरेको छ।
विज्ञप्तिमा पार्टीका सबै तह, विभाग, जनवर्गीय संगठन र सदस्यहरूलाई मानवीय सेवाभावका साथ विपद् व्यवस्थापनमा जुट्न आग्रह गरिएको छ। साथै, पार्टी केन्द्रले पनि आवश्यक समन्वयका लागि स्थायी सम्पर्कमा रहने जनाएको छ।
