प्रधानमन्त्री केपी शर्मा ओलीले चितवनस्थित बहुचर्चित गौतम बुद्ध क्रिकेट स्टेडियम सरकारले बनाउने बताएका छन् ।
बनेपा नगरपालिका–१० भैँसेपाटीस्थित अत्याधुनिक चलचित्र छायाङ्कनस्थल (स्टुडियो) को बालुवाटारबाटै निर्माण घोषणा कार्यक्रमलाई सम्बोधनका क्रममा उनले यस्तो बताएका हुन् ।
करोडौं रुपैयाँ लाग्ने उक्त स्टेडियम निर्माणको प्रस्तावसहित आफूकहाँ आएका धुर्मुस-सुन्तलीलाई चन्दा उठाएर बनाउन नसकिने सुझाव दिएको पनि उनले बताए ।
‘चितवनमा गौतम बुद्ध क्रिकेट स्टेडियम बनाउँछौँ भन्दै धुर्मुस-सुन्तली उसबेला मकहाँ आएका थिए’, उनले भने, ‘तर मैले दु:ख पाइन्छ, त्यो क्रिकेट स्टेडियममा हात नहाल्नु भनेको थिएँ ।’
आफूलाई भेट्दाको समयमा उनीहरूले उक्त स्टेडियम चन्दा उठाएरै बनाउने बताएको पनि ओलीले सुनाए । ‘तर पनि बनाउँछौँ भनेर हात हाले, अहिले उनीहरूले धेरै दु:ख पाए’, उनले भने, ‘तर पनि गौतम बुद्ध क्रिकेट स्टेडियम बन्छ । हामी बनाउँछौँ, उक्त स्टेडियम सरकारले बनाउँछ ।’
