सुनसरी । टेरामक्स प्रकरणसँग जोडिएका विवादका विषय पुनः चर्चामा आएपछि सुनसरी निर्वाचन क्षेत्र नम्बर–४ मा राजनीतिक बहस तीव्र बनेको छ। स्थानीय तहका बासिन्दा, किसान तथा युवाहरूले विकास, सेवा–सुविधा र जवाफदेहिताका विषयमा असन्तुष्टि जनाउँदै वैकल्पिक नेतृत्वको खोजी सुरु भएको बताएका छन्।
स्थानीयवासीका अनुसार बाढी र डुबानबाट प्रभावित बस्तीहरूको समस्या दीर्घकालीन रूपमा समाधान नभएको गुनासो छ। डुबान प्रभावित क्षेत्रका केही बासिन्दाले विपद्पछि स्थलगत अनुगमन र राहत वितरण नभएको दाबी गरेका छन्। सुनसरी खोला चुनावी मुद्दा बन्दै आएको र समस्या समाधान नभएको बताएका छन् ।
यस्तै, दूरसञ्चार सेवा कमजोर रहेको, टावर नरहने र नेटवर्क प्रभावकारी नचल्ने, समस्या अझै समाधान नभएको उनीहरूको भनाइ छ।
यसैबीच, विपक्षी राजनीतिक कार्यकर्ताहरूले टेरामक्स प्रकरणसँग सम्बन्धित आर्थिक अनियमितताको आरोप लगाउँदै पारदर्शिताबारे प्रश्न उठाएका छन्।
यद्यपि सम्बन्धित पक्षले यस्ता आरोपहरू अस्वीकार गर्दै आएका छन् र आफू विकास तथा पूर्वाधार विस्तारमै केन्द्रित रहेको दाबी गरेका छन्।
राजनीतिक विश्लेषकहरूका अनुसार क्षेत्रीय मुद्दा, विपद् व्यवस्थापन, कृषक राहत र आधारभूत सेवाको पहुँच आगामी निर्वाचनको मुख्य एजेन्डा बन्ने देखिएको छ। उनीहरू भन्छन्, “मतदाताले यसपटक भावनात्मक भन्दा परिणाममुखी मूल्याङ्कन गर्न थालेका छन्।”
टेरामक्स प्रकरणमा कार्कीले ३ अर्ब रुपैयाँ भ्रष्टाचार गरेको आरोप लागेको छ ।
