इन्जिनियरिङ अध्ययन संस्थान (इअसं)अन्तर्गतका आङ्गिक क्याम्पसहरूमा हप्तौँदेखिको पठनपाठन अवरोधको विषयलाई लिएर अखिल (क्रान्तिकारी), प्राविधिक शिक्षा विशेष जिल्ला समितिले आज डिन कार्यालयमा तालाबन्दी गरेको छ।
संगठनका अनुसार, विद्यार्थीहरूको शिक्षामा भइरहेको लापरवाही र समस्या समाधान गर्न प्रशासनले कुनै ठोस कदम नचालेपछि यो कदम चाल्न बाध्य भएको जनाइएको छ।
यसअघि ज्ञापनपत्रमार्फत् डिनज्यू समक्ष आफ्ना मागहरू राखिएको र त्यसलाई बेवास्ता गरिएकाले तालाबन्दी गर्नुपरेको संगठनले स्पष्ट पारेको छ।
यी हुन् अखिल (क्रान्तिकारी)को प्रमुख मागहरू:
१. आन्दोलनरत पक्षसँग तत्काल वार्ता गरी आङ्गिक क्याम्पसहरूमा पठनपाठन सुचारु गरिनु।
२. परीक्षा तोकिएको शैक्षिक क्यालेन्डरअनुसार नै सञ्चालन गरिनु।
३. प्राविधिक संस्था भित्रका गैर-प्राविधिक गतिविधिहरू तत्काल रोक लगाइनु र भविष्यमा यस्ता कृयाकलाप दोहोरिन नदिन ग्यारेण्टी गरिनु।
संगठनले भनेको छ,’विद्यार्थीको भविष्यसँग खेलवाड गर्नेलाई हामी चेतावनी दिन चाहन्छौँ -अब केही सहन सकिँदैन।’
यदि प्रशासनले अझै पनि गम्भीरता नदेखाएमा अझ कठोर आन्दोलनका कार्यक्रमहरू अगाडि बढाइने र त्यसबाट उत्पन्न हुने सम्पूर्ण जिम्मेवारी इअसं र त्रिभुवन विश्वविद्यालयले नै वहन गर्नुपर्ने अखिल (क्रान्तिकारी)को चेतावनी छ।
