प्युठानको माण्डवी गाउँपालिका-२ रातापानीमा दम्पतीको रहस्यमय हत्यामा अनुसन्धान गरिरहेको प्रहरीले घरभन्दा करिब ५० मिटर पर बारीमा रगत लतपतिएको घन फेला पारेको छ।
शनिबार दिउँसो ६० वर्षीय रामबहादुर परियार र उनकी श्रीमती ५६ वर्षीय हुकमा परियारको टाउको क्षतविक्षत पारिएको अवस्थामा शव फेला परेको थियो। उक्त घटनामा अनुसन्धान गरिरहेको प्रहरीले बारीमा घन फेला पारेको हो।
दम्पतीको हत्यामा सोही घन प्रयोग भएको हुनसक्ने प्रहरीले आशंका गरेको छ। घटनाको अनुसन्धानका लागि जिल्ला प्रहरी कार्यालय डीएसपी दिपेश बस्यालको नेतृत्वमा प्रहरी टोली खटिएको छ।
हत्याको अनुसन्धानका लागि भैरहवाबाट तालिमप्राप्त कुकुर मगाइएको कार्यालयका प्रवक्ता प्रहरी निरीक्षक केशव केसीले बताए।
