नेपाली कांग्रेसमा शक्ति संघर्षः शेखर कोइरालाको चेतावनी र सरकारप्रतिको आरोप

नेपाली कांग्रेसका नेता डा. शेखर कोइरालाले कोशी प्रदेशमा इतर समूहको सक्रियतालाई बलियो बनाउँदै आफ्नो समूहका पालिका सभापतिहरूको पूर्ण संरक्षण गर्ने दाबी गरेका छन्। मंगलबार विराटनगरमा आयोजित पालिका सभापतिहरूको भेलालाई सम्बोधन गर्दै कोइरालाले कार्यकर्ताहरूलाई डर र त्रासबिना काम गर्न आग्रह गर्दै आफू उनीहरूको संरक्षणमा कटिबद्ध रहेको घोषणा गरे। तपाईंहरू कुनै डर, भय नराखी घर फर्कनुहोस्। तपाईंहरूको संरक्षण गर्ने जिम्मा म लिन्छु, कोइरालाले भने, उनले धम्की र दवावबाट नआत्तिन कार्यकर्ताहरूलाई प्रष्ट निर्देशन दिँदै पार्टीको १५औं महाधिवेशनमा कुनै किसिमको अनियमितता हुन नदिने प्रतिबद्धता व्यक्त गरे।
केन्द्रीय कार्यालयको निर्देशन अवज्ञा
नेपाली कांग्रेस केन्द्रीय कार्यालयले कोशी प्रदेश सम्मेलनअघि कुनै कार्यक्रम नगर्न निर्देशन जारी गरेको भए पनि, इतर समूहले विराटनगरमा पालिका सभापतिहरूको भेला आयोजना गरेर केन्द्रीय सर्कुलरको अवज्ञा गरेको छ। यस घटनाले पार्टीभित्रको गुटबन्दी र अनुशासनहीनता थप स्पष्ट बनाएको छ।
सरकारप्रतिको प्रहार
नेता कोइरालाले वर्तमान सरकारप्रति कडा आलोचना गर्दै संविधान संशोधनको विषयमा ध्यान दिन नसकेको आरोप लगाए। ूसरकार बनेको चार महिना बितिसक्दा पनि सत्ता पक्ष र अन्य दलसँग संवाद अघि बढाउन कुनै चासो नदेखाइएको , उनले भने। संविधान संशोधनका लागि अन्य दलहरूसँग छलफल आवश्यक रहेको उनको भनाइ थियो।
महाधिवेशनमा दबाब अभियान
पार्टीभित्र महाधिवेशन तोकिएको समयमा हुने सम्भावना कमजोर रहेको भन्दै कोइरालाले कार्यकर्ताहरूलाई गाउँ–गाउँबाट दबाब दिन आह्वान गरे। ू१५औं महाधिवेशन समयमा हुने कुनै सम्भावना म देख्दिनँ, उनले कार्यकर्ताहरूलाई सचेत गराउँदै महाधिवेशन सुनिश्चित गर्न संघर्ष गर्न आग्रह गरे।
पार्टीभित्रको द्वन्द्व सतहमा
यसअघि, कांग्रेस केन्द्रीय कार्यालयका मुख्य सचिव कृष्णप्रसाद पौडेलले कोशी प्रदेशका जिल्ला सभापतिहरूलाई पत्राचार गर्दै प्रदेश सम्मेलन मंसिर २२ मा हुने जानकारी गराएका थिए। तर, शेखर समूहको भेलाले पार्टीभित्रको शक्ति संघर्षलाई थप सतहमा ल्याएको छ। पार्टीभित्र अनुशासनहीनता र गुटगत गतिविधिले आगामी महाधिवेशनमा थप संकट निम्त्याउने प्रष्ट संकेत गरिरहेको छ। पार्टी नेतृत्वले यसलाई रोकथाम गर्न कठोर कदम नचालेको खण्डमा नेपाली कांग्रेसको आन्तरिक कलह थप गहिरिने निश्चित छ।